كلمه شكر

أنا بجد سعيده جدا
رغم انى كنت من يومين فى قمه حزنى
بس سؤال الناس عنى واهتمامها بيا وبانها تساعدنى فى محنتى بجد اسعدنى جدا

وخلانى اكتشفت انى بجد وسط عيله جميله

وقلوبها أجمل
......................

البوست ده انا منزلاه لسببين
أولا: علشان أطمن ناس كتير جدا سألت عليا
وكانت قلقانه بسبب البوست الاخير اللى كنت نزلته
واللى كان بسبب حاله احباط وإكتئاب كنت بمر بيها الفتره اللى فاتت دى
أنا الحمدلله كويسه اوى وبقيت احسن كتير وسعيده بجد

الحمدلله على كل حال
ثانيا :لأن فى ناس بجد انا عايزه اوجه ليها كلمه مخصوص
اقل ما يقال عنها انها كلمه شكر
لانها شكر وعرفان بجميل وامتنان ليهم
لأنهم وقفو جنبى فى وقت كنت محتاجه فيه لايد تطبطب عليا وحد يسمعنى ويفهمنى
فى منهم اللى اصدقائى وبحبهم اوى
وفى اللى معرفهمش شخصيا ولا كنت اعرفهم قبل الموقف ده
بس بجد اهتموا وسألوا ووقفوا جنبى وكأنهم اصحابى من زمان
.......................

هبه و أوما
انتوا الإتنين بجد مش عارفه أقولكم ايه
ولا بجد عارفه اوصف شعورى ناحيتكم
اللى عملتوه ليا كان فعلا جميل اوى
واهتمامكم بانى اخرج من حاله الاكتئاب والإحباط دى
وزيارتكم ليا ونزولكم المنصوره مخصوص علشانى

بجد اسعدنى جدا
وفرق معايا كتير وكان يوم جميل بجد

وكان سبب رئيسى انى اخرج من الحاله اللى كنت فيها
انتو فعلا اتنين جمال اوى وقلبكم كبير
ربنا يكرمكم يا رب
أنا بجد بحبكم جدا

ويارب يديم الصداقه بينا طول العمر
........................

رحاب
سؤالك عليا والرسايل الأوف اللى سيبتهالى بجد فرحتنى جدا
أنا عارفه انك لو كان فى ايدك اكتر من كده كنتى عملتى
وسؤالك ده وقلقلك عليا بجد كأنك جيتيلى
انتى فعلا طيبه اوى وانا بحبك اوى
وربنا يديم الصداقه الجميله دى بينا يا رب
.......................

أحمد رفعت
عم أحمد الجميل أوى
انا بجد مش لاقيه كلام اقولهولك
وبجد أى كلمه شكر مش كفايه على وقفتك جنبى
رغم اننا مكناش نعرف بعض قبل كده
ومهما إتكلمت عنك مش هوافيك حقك بجد
انت إنسان جميل اوى وقلبك طيب فعلا
اهتمامك بجد وايميلاتك اللى بعتها وكلامك معايا كان حافز كبير اوى ليا
صدقنى ادانى امل جديد وشجعنى انى مش ايأس لان دايما فى امل
وبجد وقفتك جنبى عرفتنى ان ممكن ناس تساند ناس

وتساعدهم وتقف جنبهم وتهتم بيهم
حتى لو مكانش بينهم سابق معرفه
وان الدنيا لسه بخير وفيها حاجات جميله كتير
انت بجد صديق غالى عندى جدا
وعمرى ما هنسى اللى عملته معايا فى يوم
ربنا يكرمك يا رب علشان انت فعلا تستاهل
......................

ياسمين
رغم إننا متكلمناش كتير وكنا مش عارفين اوقات بعض على النت
بس ايميلاتك بجد حسستنى قد ايه انتى طيبه وجميله
واهتمامك بمساعدتى وايديك اللى مدتهالى عمرى ما هنساها ابدا
انت فعلا من احسن الناس اللى قابلتها فى حياتى
وقلبك وتفكيرك وعقلك ونضجك مثال يحتذى بيه لاى بنت فعلا
ربنا يخليكى لبناتك ويكرمك يا رب
........................

ضياء
او هقول ذو العقل الجميل والقلب الاجمل
انت بجد انسان رائع وايميلاتك ومساندتك ليا عمرى ما هنساه
انت اكتر واحد بجد فهم مشاعرى واحساسى
لانك يمكن مريت بنفس التجربه والاحساس
وده خلانى اخرج اللى جوايا وافضفض بكل اللى عايزه اقوله
انت فعلا صديق عزيز عليا بعتز بصداقته جدا
ربنا يكرمك يا رب ويحققلك كل اللى بتتمناه
...................

أمانى

معرفتى بيك واهتمامك ومساندتك ليا وكلامك معايا

بجد أثر فيا جدا وحسسنى أد ايه الدنيا فيها ناس جميله زيك

والادعيه اللى بعتهالى وكلامك اللى زى البلسم

فعلا ريحنى جدا

أنا سعيده بمعرفتك وبصداقتك

ربنا يديم صداقتنا ويكرمك يا رب

........................

كل اللى بعتلى ميل يطمن فيه عليا
وكل اللى سابلى كومنت فى البوست اللى فات
انتم بجد كنتم سبب سعادتى فعلا
وكان اهتمامكم سبب رئيسى انى اخرج من الحاله دى
وارجع ريم تانى اللى الناس تعرفها

وأنسى اليأس اللى كان سيطر عليا
سعيده جدا بتواصلكم
وبجد شكرا ليكم واحد واحد
شكرا
.................