Saturday, December 09, 2006

انا والنت



دايما الافكار دى بتيجى فى بالى عن النت وعلاقاته

النت بجد ده حاجه غريبه ودخلت حياتنا

وعمل علاقات جديده فى حياتنا

علاقات زى الصداقه والحب والزماله والاخوه والكره

كلها احاسيس ومشاعر بنحسها فى الحياه الطبيعيه
مع ناس حوالينا وبينا تعامل مباشر معاهم

اما النت بقى فخلق العلاقات دى بينا وبين ناس عمرنا ما شفناهم

ومنعرفهمش وممكن نفضل على طول منعرفش ايه شكلهم

وممكن نشوف شكلهم عن طريق صوره او لو كان الحظ احسن هيبقى فى كاميرا

وواحده واحده تلاقى الشخص ده بقى قريب منك بتتكلمو كتير

وبتقضو مع بعض وقت اكتر من اللى بتقضيه مع اهلك واصحابك الحقيقين

وممكن تبقو زمايل او اخوات او اصحاب

وممكن كمان تبقو انتيم وممكن كمان تلاقى علاقات الحب اللى كان سببها النت

كل ده وممكن متكنش شفته لكنه بتحبه وبتثق فيه وممكن تحكيله ادق اسرارك

اسرار ممكن متكنش فكرت تحكيها لاى حد حتى اقرب الناس ليك تخرج ليهم

وواحده واحده تلاقى نفسك بتبعد عن عالمك الحقيقى

وبتدخل عالم تانى ادواته الرئيسيه عباره عن كى بورد فى ايدك

وشاشه قدامك وميك وكاميرا

وتلاقى زمايلك هما اللى على النت

اخواتك برده على النت

اصحابك اكيد على النت

وكتير حبايبك بيبقو برده على النت

من غير ما نشوفهم من غير ما نكلمهم وهما قدامنا

من غير ما نعرف اذاكان الكلام ده حقيقى والشخصيه دى حقيقه

ولا مجرد تمثيل فى تمثيل

هما فعلا اشخاص كتير ولا كلهم شخص واحد بكذا وش

ونلاقى نفسنا كل يوم بندخل فى العالم ده اكتر واكتر

ونغوص جواه اكتر واكتر وعلاقتنا تكتر ولو فكرنا نبعد نلاقى اننا مش قادرين نبعد عن الناس دى

لانهم بقى بيمثلو جزء فى حياتنا واحداث حياتهم بقت هى احداث حياتنا

ونستمر فى علاقاتنا

علاقات جديده علاقات غريبه

مجرد اختراع زى اى اختراع فى العالم

بس دخلنا لدنيا جديده وناس جديده وخلق تواصل من نوع جديد

اخوات النت واصدقاء النت وحب النت

وبقت دى مواضيع بناقش اثرها فى حياتنا

فعلا النت ده ااختراع قلب حياتنا

وخلق حياه جديده لحياتنا

عجيب النت ده

واللى يعيش ياما يشوف

3 comments:

sofinqoraso said...

عندك حق والله يا ريم
عالم غريب ويشدك أوى
وتلاقى نفسك داخلة فيه بكل ما فيكى
وتلاقى نفسك بتعيش احاسيس معيشتيهاش مع ناس بتشوفيهم كل يوم
وأكيد بتاخدى خبرة جامدة فى التعامل مع الناس
وغنك تعرفى فين الصح وفين الغلط
وأحيانا بيقلب بإدمان
وساعات حتى اصحابك فى الواقع بتحبى تكلميهم على النت
كانك برمجتى دماغك

sofinqoraso said...
This comment has been removed by the author.
Anonymous said...

بصى يا باربى
انا عاوز اصقفلك و اقولك الف برافو
عشان كتبتى حاجة تخص جيل بحاله استخدم الانترنت و عاش فيه حياة زييى وزى ناس كتير
كتبتى اللى جوايا وجوة غيرى بمنتهى الواقعية اللى كلنا عايشينها
بس انا عاوز اقولك
انا حابب المجتمع ده بجد وحاسه احلى من المجتمع الخارجى بكتير وده عشان انا عرفت فيه ناس حلوة اوى مكنتش هعرفهم الا فيه
وطبعا انا عرفت افلتر الوحش ومش اخده او اقرب منه
وفضلت محتفظ بالحلو بس
شكرا ليكى يا باربى على البوست التحفة ده