Monday, September 17, 2007

كلنا فى الأسم ليلى


عدت سنة علي ليلي , كانت فيها مجهوله بالنسبالى
وفى السنه التانيه سمعت عنها وقريت عنها وعجبتنى الفكره فققرت انضم لأسره ليلى
وأجاوب على اسئله ليلى واللى مررتهالى صديقتى ابيتاف
.
.

هل انتِ سعيدة كفتاة وبدورك فى الحياة؟

سعيده جدا بكونى فتاه وبحس انى فعلا مكنتش اقدر اكون ولد فى يوم ولا أعيش غير كفتاه وبالنسبه لدورى فى الحياه انا بحاول أكون راضيه عنه بحاول على قدر المستطاع لكن بالنسبه لدور الفتاه عامه فأنا من رأيى انه اساسى فى الحياه ده لو مكنش هو الحياه نفسها
.
.

ما الذى لا يعجبك فى المجتمع اتجاه نظرته لليلى ؟؟

ان كتير جدا بينظر لليلى على انها تافهه وسطحيه,وده غير صحيح بالمره ليلى عندها عقل متميز وشخصيه تستاهل التقدير كمان نظرته لان ليلى دائما عوره يجب سترها من يوم ولادتها وان اختلاطها وخروجها للمجتمع من الممكن ان يكشف العوره لذا يجب استبعاده وللأسف ان النظره دى مازالت موجوده ومنتشره رغم كل ما يقال من رفض واستنكار وبرغم الإطار الظاهرى بأن المراه اخدت فرصتها واللى فى الباطن مختلف هو ببساطه قشره سهله الكسر صنعها البعض
.
.
ما رايك فى دور الاعلام فى ترسيخ صورة نمطية عن المرأة؟ ومعالجات قضايا المرأة؟ وتأثيره؟

الاعلام مهتم بالمرأه كجسد مثير ووجه جميل ...قليل من الاعلام اللى بجد بيناقش مشكله تهم المرأه ده لو مكنش منعدم تقريبا المرأه فى الأعلام مكمل , جسد متحرك او جزء اضافى للأساسى ..أكيد فى استثناءات فى الموضوع لكن زى ما قلت قليله تكاد تكون منعدمه ...باختصار الأعلام ظلم المرأه وحصرها فى اطار معين
.
.
ما رايك فى يوم ليلى ؟؟
مبادره تستحق الاحترام وفكره تستوجب كثير من الاهتمام
.
.

أول خطوة.. اقتراح لتغيير مشاكل معينة ؟؟
أول خطوه تغير النظره على ان البنت عوره وعيب , نبطل كلمه انتى بنت فى مجتمع شرقى , نبطل كلمه الولد حر لكن البنت مينفعش تكون حره , نعترف بان ظاهره المرأه المتحديه القويه اللى اخدت فرصتها دى وهم صنعه الاعلام وصدقه المجتمع وان حقيقه الحال فى بيتى وبيتك وبيت كل واحد انه غير كده وان لسه فيه لا وممنوع وان البنت تبقى مينفعش , ميصحش , وعيب
.
.

هل تحبين نفسك أم تتظاهرين بالقوة؟
بحبها جدا وبعتز بيها أكتر... كتير بتظاهر بالقوه لاننا كتير بنحتاج فى دوامات الحياه اننا نمثل القوه حتى لو كنا مفتقدينها
.
.
هل تعرفين دورك في الحياة أم تتسابقين وتلعبين أدوارا مرسومة وفقط؟
أكيد عارفه دورى ... لكن مش هقدر اقول انى بنفذه كامل لأن الأدوار المرسومه كتير بنكون مجبرين عليها مهما تحدينا واعترضنا
.
.
هل مستعدة أن تدافعي عن وجهة نظرك عموما أم تجبنين عند المواجهة؟ وهل ترين جبنك سمة شخصية أم يغذيها من حولك؟
لا بدافع عنها كتير حتى لو عارفه انى مش هكسب الجوله بيكفينى انى قلت وجهه نظرى أما جبنى فكتير بيكون ناتج عن مؤثرات خارجيه وخوف من رد فعل معين وده بيضطرنى انى انى احتفظ بوجهه نظرى لفرصه تانيه لأنى مدركه تماما قوه وجهه النظر الأخرى المترسخه فى عقول أغلبيه المجتمع ونظرته للبنت
.
.
ما مشاكل ليلى الملحة في المجتمع من وجهة نظرك؟ ما مصدرها؟ هل يمكن حلها؟ وهل عندك موقف شخصى من واقع الحياة؟
أول مشكله واللى انتشرت بشكل كبير جدا
مشكله العنوسه وتأخر سن الزواج وكلمه عانس اللى بقت خطر يهدد كل بنت عدت سن ال25وملازمه لكل من تعدت ال30 مصدرها فكره ان البنت دورها الاساسى فى المجتمع هو الزواج والانجاب واللى جعل كل من تفقد الجزء ده فى حياتها انها ناقصه فقدت معنى حياتها أما حلها بيكمن أولا فى الثقه بأن كل ترتيبات الحياه ماهى الا نصيب مكتوب من عند الله ولا ذنب لليلى فيها وثانيا تغير الأفكار ومحاوله الانصاف فى النظرإلى ليلى وان كان جزء من حياتها فقدته من حقها انها تكمل الجزء التانى بدون اى ظلم او نظره مقلله من شأنها

وطبعا لا يمكن التغاضى عن مشكله التحرشات سواء الجسديه او اللفظيه او حتى تحرشات النظر واللى اصبحت شامله كل البنات بغض النظر عن التزام او احتشام او شكل او جمال فكفايه انها تكون انثى ده كفيل بتعرضها لجميع انواع التحرشات الممكنه من أول النظر الى اللمس وأكيد مصدرها نظره الكثير للمرأه على انها جسد للتمتع فقط وان كل ممنوع مرغوب أما حلها فأعتقد انه بيحتاج لثوره على عقول المجتمع لتصحيح الأوضاع
.
.
هل ترى المرأة أقل من الرجل في أي مستوى من المستويات؟ و إن كان فعلا، فما هي هذه المستويات؟
مش أقل ولا أكثر , المرأه والرجل متكاملان كل واحد فيهم بيكمل التانى وكل واحد فيهم مهم زى التانى بالظبط ...المستوى واحد للأتنين ...ومستوى كل واحد فى الاتنين لا تقل أهميه على مستوى الآخر
.
.
بعد مرور سنة من يوم ليلى الأول ماذا تغير في وضع ليلى؟
أولا ماذا تغير حولها في الشارع، كالظروف و المشاكل في مصر بالنسبة للبنات والسيدات صارت أحسن أم أسوأ؟
ثانيا هل تغير شيء شخصيا بالنسبة لك أو بداخلك؟ هل أصبحت شخصية أكثر انفتاحا أم انغلاقا؟ ثقة أم عدم ثقة؟ ولماذا؟

بدايه من سنه لم اكن قد تعرفت على ليلى وان كنت عرفت الكثير من بنات ليلى أما الوضع أصبح اسوأ بالنسبه لليلى واصبحت مشكلاتها أكثر تعقيدا ونظره المجتمع تغيرت واصبحت أشد قسوه ...بالنسبالى شخصيتى بحسها بتتغير كل يوم مش كل سنه , كثره العلاقات والقراءه والسمع بيغير حاجات كتير جدا جوايا ...وأعتقد انى شخصيتى معتدله نوعا ما مبتحبش الانفتاح الكبير ولا بتفضل الانغلاق الشديد برده ...بس بالنسبه للثقه فأنا اصبحت أقل ثقه بالمجتمع لانه اصبح من سيء الى اسوأ والثقه بقت صعبه جدا فى ظل تغيرات وتقلباته السيئه
اما ما تأكدلى هو انه باختلاف طبيعتنا الشخصيه والعرقيه والطبقيه والشكليه

لكن كلنا بنات حواء نندرج تحت إسم واحد
"ليلى"
.
.
للتعرف أكثر على ليلى تابع مدونه
كلنا ليلى

33 comments:

محمد عبد الغفار said...

أعتقد انه بعد عام احوالكن اسوأ

غمض عينيك said...

كل سنة وليلى بخير

Anonymous said...

thanks for sharing your opinion, Reem :) hope Laila's issues gonna be better for the benefit of all of us insha Allah

اسكندراني اوي said...

انا للاسف مقرتش بتركيز عن الحمله لكن واضح من البوست انه شيئ جميل كعاده مدونينا اصحاب الافكار الجيده

حدعبس وحوصل اكييييييد

تحياتي

Ahmed Magdy said...


الفكره انا احترمتها جدا بصراحه أول ما عرفتها .. هو انا لسه عارف الفكره دى .. و أنا مقتنع 100% بإن المرأه فى ظروف مش لطيفه :D
متضامن معاكم :D
************
بس فى بعض الأحيان انا بحس ان المرأه فى العصر ده اخدت حقها اكتر من رجاله كتير :D

شيماء الجيزى said...

اولا صديقتى
جميل ان يمر عام على شعارنا ليلى
كلنا ليلى

عزيزتى
ارى التباين بين حقوقنا التى يقولوا انتن اكتسبتن كافة الحقوق
وما يحدث فى واقعنا المؤلم

فليلى التى يجب ان نتكلم عنها ليست تلك التى تاخذ حقها وهى متربعه على عرش الانوثه
ولكن تلك التى لا تعرف كونها ليلى كيف ولماذا؟

تلك الليلى التى من الصعب ان تنضم لهذا اليوم ..تلك التى لا تعرف ان لها حقوقاً واجبه

اتعلمون بتلك الليلى؟

هى من تستحق هذه الليله

تحياتى لكِ

LAMIA MAHMOUD said...

طبعا انا مش محتاجة اقول اني متفقة معاكي في ردودك

سعيدة بانضمامك جداااااا

Rana said...

بحب فيلم(الباب المفتوح)وفكرة ذكية ان كلنا نكون(ليلى)البطلة،أول مرة أشوف مدونتك وقلت انى لازم أعلق لسببين أولهم أغنية فيروز(بعدك على بالى)اللى بحبها والتانى انك من المنصورة :)أكيد هتابع بعد كدة.

Anonymous said...

Society Culture is a major reason & Ecofeminism as a worldwide move - in Egypt both are leading towards no way unless research in place to identify the root cause (of Lily problems)which is 50% of the solution.

Mohamed Hesham Safa said...

حلوة الفكرة ...

ويا رب تقدروا تحققوا تقدم ...

انا مؤيد للفكرة بشدة ...

وكل عام وانتم بخير ...

والسـ ختام ــلام

Diyaa' said...

الموضوع محتاج كتير أوي للرد
خصوصاً إني مش موافق علي النظرة الفئوية اللي مبنية علي أساسها المدونة
يعني المشكلة العويصة مشكلة مجتمع فشل في تشكيل الرجل والمرأة...معلش مع احترامي يعني مفيش ملايكة إلا من رحم ربي واللي للأسف بيتنقطوا ويموتوا أو ينعزلوا أما الغالبية فبشر بتغلط ومينفعش اختصار العيب والمشاكل في يا رجالة عيب بصوا للأنثي بصة أحسن من كده شوية
إذا كان الراجل ده مكانش ليه أم بتعرف تربي ..ولا أب ..يبقي نلومه هو ليه لوحده ؟؟!!
يلا تحياتي
سلام عليكم

سندباد said...

رمضان كريم
كل سنة وانتي طيبة
وليلي تحقق اللي في نفسها

محمد العدوي said...

وكل يدَّعي وصلاً بليلى وليلى لا تقر لهم بذاكا


وعلى مثل ليلى يقتل المرأ نفسه ..


كل سنة وليلى بخير ..

Anonymous said...

بيان هام جداااااااا
تابعوا أحداث الافطار الرمضانى الجامد جدا مع خالد الصاوى فى الساقيه
والتفاصيل على مدونتى الصغنونه
وماحدش يتأخر

أسوور said...

كل سنة وانتى طيبة
مرة عشان يوم ليلى ومرة عشان رمضان

حزيــــــــــــــــــن said...

بيتهيألى ان ريم افضل بكتير من ليلى
دى وجهة نظرى
بس الفكره ان المرأه حواليها دائرة ضوء الايام دى
فبتحاول تستخدمها

عموما لو كنت بتحبى ليلى اللى جواكى
فكل عام وليله طيبه

افتقد تعليقاتك

ذو النون المصري said...

كل سنه و انتي طيبه و كل ليلي بالف خير
.........
ياريت السؤال ده يساعدني في حله اي زائر
كيف اعمل صوره للبروفايل الشخصل بالمدونه؟
و شكرا

Rania Lelah said...

ريموووووو
اخبارك يا قمر؟
كلامك هايل كالعادة
كل سنه و انت طيبة
رمضان كريم

محمد عـنـانـى said...

اوفق واختلف فى بعض الاراء
اوقات بشعر ان المراء لا تاخذ حقها واوقات اخر اشعر انها لابد من ان تجرد من كل حقوقها نظر لا الاستغلال السئ ولابد ان نعترف بان مجتمع شرقى ولا نستطيع ان نتجرد من هذا والا اصبحت بناتنا لا يصلحا لاشى
فنحن مجتمع يقدر المراء ويحترمها فهيا ام واخت وزوجه ليس كا الغرب سلعه تكاد تكون عاريه تمام معرضه
فنحن لا اننا مجتمع شرقى مسلم محافظ
نحافظ على كيان المراء ونوفق لها ظروف العيش
اما فى الغرب الذى غالبا نقلد منه او نستعير منه بعض العادات فنجد ان المراء مطالب منها ان تكون اشياء عديده لا تصلح لكونها امراء لم يخلق الله المراء هكذا
اما عن باقى كلامك فانا شبه متفق معه
اما با النسبه لليلى وما تفعلو من اجل ليلى ان تشعر كل امراء انها ليلى وتتوج من تاج ليلى
فا انا ارى ان ليلى اصبحت تقلد الغرب بشراه مما ادى الى انها اصبحت تشابه الذكور سواء فى الطباع او الشكل او الملبس او او او
ودائما قد خلق الله الانسان يبحث عما يفقده فا الذكر يشعر بنقص الانث واذا كانت الانث كا الذكر اصبح لا يفرق كثير
فهو لا يبحث عن هذا
مما ادى الى انتشار العنوسه بجانب الحاله الاقتصاديه
فهناك من هم ظروفهم الاقتصاديه جيده ولكن لا يجدونا ليلى
فا اتمنى ان تصبح كل السيدات ليلى
واسف للاطاله
تحياتى

Mustafa Şenalp said...

very nice a blog.:)

صاحب البوابــة said...

اتمنى ان تؤتي الحملة ثمارها في اسرع وقت

تحياتي اختاة

Reemo said...

عبد الغفار
اتفق معاك تماما
الحال من سئ لأسوأ
تحياتى
----------
غمض عينيك
وانت بألف صحه وسلامه
----------
ايبى
انا اللى سعيده انى شاركت فى الحمله
وبتمنى انا كمان ان حال ليلى يتحسن
برغم كل شئ وكل السلبيات
فعلا بتمنى انه يتغير للأحسن مش الأسوأ
قبلاتى

Reemo said...

اسكندرانى
انا ضيفت لينك مدونه كلنا ليلى فى نهايه البوست
تقدر تدخل عليه وتتفحصه
والفكره صدقنى جميله جدا وهتعجبك
تحياتى
-----------
سازمند
انا اتكلمت معاك فى الموضوع ده واتناقشنا
واعتقد انى قدرت اوصلك وجهه نظر المرأه
فى الظروف اللى بتحصل معاها
وزى ما قلت ان المرأه اللى اخدت حقها
وهم صنعه البعض
ولا ايه؟ :D
------------
شيماء
انا متفقه معاكى فى التباين ده
هى دى الحقيقه للأسف
لكن للأسف الأغلبيه تخلط ما بين ليلى وتلك الأخرى
فى حين ان ليلى الحقيقيه
لا تعرف ان لها حقوقا من الأساس
تحياتى
-------------

Reemo said...

لومى
انا عارفه يا حبيبتى ان وجهه نظرنا عاده ما بتتفق
وردودنا دائما بتتشابهه
انا سعيده جدا بانضمامى
قبلاتى
-------------
رنا
أهلا بيك فى اى وقت
المدونه تحت أمرك
مش عارفه اى فيلم تقصديه
مشفتوش قبل كده بس اتمنى اشوفه
سعيده بزيارتك
تحياتى
-------------
Mohsen Abouzeid
اتفق معك فى ان ثقافه المجتمع
هى السبب الرئيسى فى مشاكل ليلى
واعتقد فعلا ان لحل المشاكل
فنحن أولا نحتاج لثوره على تلك العقول
تحياتى
-------------

Reemo said...

mohamed hesham
اسعدنى تأييدك للفكره
لانها فعلا تستحق
كل عام وانت بألف صحه
اسعدنى المرور
تحياتى
-------------
ضياء
احنا مقلناش ان فى ملايكه
احنا مدركين ان المجتمع فاشل فى تكوين شخصيه رجل أو مرأه
لكن انت مش شايف
انا الظلم الواقع على المرأه اكبر بكتير
وان كمان المجتمع ممكن يغفر ويسامح للرجل
فى حين انه مستحيل يغفر للمرأه
الفشل فى الاتنين
لكن النظر للفشل ده فئوى من ناحيه المجتمع
وليس من ناحيه ليلى
تحياتى
-------------
سندباد
الله أكرم
وانت بألف صحه وسلامه
ان شاء الله ليلى السنه الجايه تكون احسن
تحياتى
-------------

Reemo said...

محمد العدوى
برغم انا المرأ يقتل نفسه على مثل ليلى
لكن فى النهايه لا ينصف ليلى واخواتها
سعيده بالزياره
تحياتى
-------------
وينكى
دايما معاك آخر الأخبار يا قمر
اكيد محدش بيتأخر عن وينكى الصغنونه
قبلاتى
-------------
ياسمين
وانت بألف صحه وسلامه يا حبيبتى
وحشانى كتير
اتمنى اسمع منك قريب
قبلاتى
-------------

Reemo said...

حزين
ريم وليلى الاتنين واحد
كلنا فى الاسم ليلى يا حزين
ومايصيب بنات ليلى اكيد هيأثر فيا
كل عام وانت بألف صحه وسلامه
تحياتى
-------------
ذو النون المصرى
وانت بألف صحه وسلامه
جاوبت على سؤالك فى الشات بوكس عندى
وهضيفه فى مدونتك
ارجو ان يفيدك
تحياتى
-------------
رانيا
انا الحمدلله تمام يا قمر
ميرسى يا قمر على زوقك
وانت بألف صحه وسلامه
قبلاتى
-------------

Reemo said...

محمد العنانى
انا مقلتش ان المجتمع يتجرد من شرقيته
لكن انا شايفه انه تحت مسمى شرقى
فالمجتمع بيقسو على ليلى لكونها امرأه
واختلف معك فى ان المجتمع لا ينظر ليلى على انها سلعه
فبرغم انها ام واحت وزوجه
الا ان كثيرين يتعاملون على اسا ان ليلى جسد وسلعه
الى جانب ان ليلى المقصوده فى كلامك
هى ليلى اللتى سبق ووصفتها بانها وهم صنعه البعض
وهى ليست المقصوده من قبلنا
فنحن نقصد ليلى التى تجاهلها لمجتمع
ليلى التى لا تستطيع مواجه ظروفها القاسيه
وتضيع فى وسط ليلى القشره والوهم الذى صنعه البعض
سعيده بزيارتك
تحياتى
-------------

Reemo said...

Mustafa Şenalp
Thnks very much
-------------
صاحب البوابه
اتمنى انا ايضا ان تؤتى تلك الثمار
سعيده بزيارتك
تحياتى
-------------
محمد
ان شاء الله ليا زياره قريبا
اتمنى نجاح المجله
تحياتى
-------------

Anonymous said...

على فكره انا متضامن مع المراءه وواثق اكيد انى المراءه فى حياه اى راجل ام واخت وزوجه وببنت يعنى معاه فى كل حياته وربنا يوفقكم

حصان بري said...

طبعا الصنف الخشن ملوش تعليق هنا
بس عجبني البوست الجديد
الاعلان بتاعه اصلا تحفه
والصوره دي حلوه قوي
كل سنه وانتي طيبه يا ريم

أمــانــى said...

كـل عيـد وانتم بخير واعاده الله عليكم وعلى الامـة الاسـلامية بالخير واليمن والبركات
يااااااااااااااااارب آمــــــــــــين

Reemo said...

رئيس جمهوريه نفسى
تضامنك مع المرأه بجد يسعدنى جدا
زى ما قلت المرأه هى الحياه
اسعدنى مرورك
كل سنه وانت طيب
تحياتى
----------------
حصان برى
البوست مفتوح للصنفين خشن وناعم:))
انا كمان عجبنى الاعلان
والجمله توقفت عندها كتير جدا
اسعدنى مرورك
كل سنه وانت طيب
تحياتى
-----------------
امانى
كل سنه وانتى بألف صحه وسلامه يارب
بعوده عليكى الأيام
قبلاتى