Wednesday, April 04, 2007

تـــــــاج


التاج ده من عند احمد مبرمج حر
هو عباره عن سؤال واحد
لكن بصراحه الكلام فيه ممكن يكون كتير جدا وممكن اقعد لبكره اتكلم فيه
بس انا هحاول اختصر
التاج هو

تكلم عن هواية لما بتمارسها بتستغرق فيها تماماً وتنفصل عن عالم الواقع لفترة من الوقت أثناء ممارستها

انا عندى هوايتين اساسيتين فى حياتى
الاولى بدات معايا من صغرى وكبرت معايا وفضلت معايا ليومنا ده
هى الرسم
لو قلت انى بعشق الرسم يبقى ده قليل اوى على اللى بحسه
بس للاسف انى مبعرفش ارسم غير نوع واحد بس هو البورتريه
لكن مثلا مناظر طبيعيه او حيوانات اوحاجات من دى فانا فاشله تماما فى الموضوع ده
الرسم فعلا اكتر شئ فى الدنيا بيخرج الطاقه والانفعالات اللى جوايا
بقدر اعبر بيه كويس عن اللى عايزه اقوله لانى كتير جدا بفشل انى اكتب اللى بحسه
لكن ممكن اعبر عنه برسم كويس اوى
والرسم عندى له طقوس خاصه جدا مبعرفش فعلا ارسم من غيرها
ليه مش عارفه برده بس هو كده :)
مج النسكافيه وصوت فيروز واسكتش الرسم ولازم يكون كبير وحوالى 3 او 4 اقلام فحم او رصاص تقيل
عمرى معرفت ارسم غير بالفحم او الرصاص مع انى حاولت اتعلم ارسم بحاجت تانيه بس فشلت برده
ولو حاجه من الحاجات دى مكنتش موجوده فعلا مش بعرف ارسم ولا خط واحد
لما برسم بنفصل عن كل العالم اللى حواليا بنسى الناس والدنيا وكل حاجه
مبفتكرش غير حاجتين بس الرسمه اللى برسمها وصوت فيروز
ولو بدات فى رسمه مش بقوم ولا بنام غير لما اخلصها مهما استغرقت من وقت
بس للاسف انى بقالى سنه تقريبا مرسمتش ولا رسمه واحده
والسبب هو الهوايه التانيه اللى ادمنتها من حوالى سنتين تقريبا
وهى الكمبيوتر والانترنت
فى ناس كتير بتقول عليا انى مدمنه كمبيوتر ونت
هما ممكن يكونو صح بس انا فعلا مش بقدر استغنى عن الكمبيوتر ولو ثوانى
بقعد عليه ساعات متواصله كتير
وكل ما اعرف حاجه جديده فيه الاقينى دخلت فى حاجه تانيه
وابدا اعرف الجديد والاقى نفسى فى دوامه مش بتخلص
وكتير فعلا حاولت انى ابعد عن الجهاز شويه او افصل نت
بس فعلا مش بقدر اخرى يوم وبلاقى نفسى تانى يوم هتجنن لازم اقعد على النت
الصيف اللى فات قلت هاخد اليومين بتوع المصيف اجازه
وعلى اللى حصلى ايامها كنت هتجنن وادخل اى نت كافيه
انا فعلا لما بقعد على الكمبيوتر بنسى كل الدنيا وكل العالم
لدرجه انى كتير مبعرفش ايه اللى بيحصل فى البيت عندنا لانى مش بقعد معاهم
وكتير كمان كنت بلغى الدروس علشان اقعد على النت لدرجه انى خسرت مجموعتين السنه اللى فاتت
الطلبه سابتنى بسبب انى بلغى الدرس كتير :)
ولو اضطرتنى الظروف مثلا انى اخرج او اروح مشوار مهم او ازور حد
ألاقينى مش بتكلم غير عن الكمبيوتر او ممكن استأذن اشوف حاجه مهمه عندهم فى الجهاز
هو حب او ادمان او هوايه مش عارفه
بس اللى اعرفه فعلا انى بنفصل عن العالم سواء كنت برسم او قاعده على الكمبيوتر
التاج ده انا عايزه امرره لمجموعتين
اولا اصحابى اللى بحبهم فعلا واللى هما اغلى حاجه عندى

Sazmnd
Hoba
Oma
Noher
re7ab

والمجموعه التانيه
ناس انا معرفهمش شخصيا بس دخلت مدونتاهم وعجبتنى فعلا
وعجبتنى كتابتهم واسلوبهم وكلامهم وبتابع المدونات عندهم اول باول
ونفسى اعرفهم اكتر


Yasmina . Nour . حـزين . ارتعاشه
Rania . Ody . Shermen . Amera . Lmiaa
Shaimaa . شيماء الجيزى . Shayma . على الألفى . A.Samir

42 comments:

أحمد said...

السلام عليكم ورحمة الله وبركاته

أزيك يا ريمو

أنا شايف السعادة كلها بتفوح من المدونة ممزوجة بصوت فيروز الخالد

ربنا يسعد أيامك
(:

رااااااااااااااااائع يا ريمو

هواية الرسم روعة يا ريمو , أنا كان نفسى يبقى عندى الهواية دى بجد

تحياتى

david santos said...

Hello!
Very nice, thank you
have a good day

Reemo said...

احمد
ربنا يخليك يا رب ويسعدك طول عمرك
انا فعلا مبسوطه جدا النهارده
الحمدلله
ياريت كنت اعرف اعلمك الرسم
بس هو للاسف مش بينفع يتدرس
لازم يكون فى هوايه
ميرسى ليك على مرورك
نورتنى

shermen said...

بصي يا قمر الرسم ده شيء ممتع ويمكن أحسن من الكمبيوتر والنت نصيحه مني أرجعي مارسي الرسم ده تاني انا عندي إحساس ان ك بتبقي سعيده أوي وأنتي بترسمي مين عارف يمكن في يوم من الأيام تبقي رسامه مشهوره ربنا يسعدك يارب
وعلى فكره الرسم بالفحم والرصاص فن له طابع خاص أنا بعشقه

إبراهيم محسن said...

هاي ريمو

هواية الرسم دي طبعاً تدل على احساس جميل.. وواضح من شغل عرض الأزياء في المدونة التانية

انا برده عندي نفس الهواية بس صدفة اننا مبنعرفش نلون
او مبنحبش انا بحب الرسم بقلم الفحم قوي

بيديني احساس يجنن.. بس واضح انك فنانة عاوزين نشوف حاجة بقى

أما الكمبيوتر والنت فدول مصايب.. هيديعوا عمر الواحد.. ساعات طوال عليهم.. مصايب.. بس ساعات مفيدين .. انا لما عملت بلوج بقيت اكتب كتير واقابل ناس كتير

بس خدي بالك من عينك ووقتك
اغلى حاجة في الدنيا
اوك سلام يا ريمو

Anonymous said...

جمييييييييييييييييييييييل اوييي...بنت و رسامه و بتحب فاروق جويده...ماشاء الله..
بجد لازم تحفظي على الموهبه ديه لازممم

و بجد اول مره حد يتاجني ف انا هتقل شويتين..:)

Reemo said...

tanks david
_______

shermen
فعلا الرسم بالفحم له طابع مميز وخاص به
بس انا فعلا الكمبيوتر بقى فى دمى
اكيد هرجع للرسم مش هسيبه ولا هبطل
وربنا يسمع منك يا رب
انا مستنيه اجابتك على التاج
ميرسى يا جميله
نورتينى

Reemo said...

ابراهيم

بجد صدفه جميله انى الاقى حد عنده نفس موهبتى وكمان رسم بالفحم
وهو بجد بيدى احساس روعه
انا مقدرش ابعد عنالكمبيوتر فعلا
بس بحاول اقلل على قد ما اقدر
وان شاء الله هخلى بالى من نفسى
وميرسى ليك انك متابع المدونتين
ولو انى مقصره شويه فى حق المدونه التانيه
بس هنزل فيها بوست قريب
نورتنى

Reemo said...

بحب فارووق جويده جدا
وبعشق نزار قبانى
وبموت فى صوت فيروز :)
اتقل ماش يا ارتعاشه
بس مش اوى
انا مستنيه اشوف التاج
انا متابعه مدونتك على طول
نورتنى

AHMED SAMIR said...

انا بقى اول ما التاج وصلني....مااقدرتش اتمالك اعصابي من المفاجأة
وقلت والله مانا مكدب خبر فكتبت هواياتي اللي انا متاكد ياريم انك اول ماهتقري
هتقولي لي يابني روح اتعالج....شوف لك هوايه ان شاء الله تكون نشر غسيل
عموما الف شكر ليكي....والى الامام دايما

Reemo said...

ان بجد مبسوطه انك رديت على التاج
وكمان بالسرعه دى
انا هدخل اقرى واسيبلك كومنت فى البوست عندك
نورتنى يا سمير فعلا

محمد عـنـانـى said...

بصراحه انا كل يوم اكتشف ان التدوين رائع
كفايه انو بيعرفنا على ناس كويسه كتير كل واحد ليه فكر وسياسه خاصه بيه وفى الاخر كل الناس كويسين
اما عن هوايتك
هوايه رائعه
ارسمى انتى وبس وسيبى الباقى على ربنا

Rania Lelah said...

طب ليه بس الاحراج دة يا قمر
انا تقريبا اتحول عليا تاجات بعدد شعر راسى
مدونتك سكر زيك رقيقة و لذيذة قوى قوى

Horas said...

بداية مدونة رقيقة وجميلة وبتعبر عن شخصية رقيقة وجميلة انا بحكم اني عملي وادماني وحبي للتسويق والبيع والإعلان وبحكم حبي للفن والفنانين هعقد معاكي صفقة لطيفة منها ترجعي موهبة الرسم الجميلة الي موقفاها ومخليه النت والكمبيوتر سيطروا علي حياتك وبما ان التوازن شيء مطلوب فأنا محتاج منه بجد مش بهز بورتريهات ليه شخصيا اشتريها منك وممكن اساعدك اننا نخلي الموهبة ده تجبلك فلوس
بجد حرام تستلمي للكمبيوتر وبالشكل الهيستيري ده رغم انه حاجه كويس جدا لكن مش بالشكل ده وكمان موهبة الرسم ده حاجه ر بنا يديمها عليكي
آسف للإطالة منتظر ردك
وربنا يسعدك اوقاتك

ody911 said...

أنا بسميها إدمان التاكنولوجيا


هههههههههه

أصلى مدمن برضوا يعنى


بينى وبينك هوة مشكلة كبيرة إدمان الكمبيوتر والنت


بس هنعمل إيه بقة

أدينا بنتسلى

هههههههههههه

إنما هواية الرسم دى فعلا هواية جميلة

أنا كان نفسى أعرف أرسم


وبالأخص رسومات الفحم


لانها بجد شكلها تحفة

بموت فيها


مع شوية بطاطس محمرة

هههههههههه


لاء بجد

هواياتك جميلة وبدل على شخصيتك برضوا يعنى


أما بقة جزئية إنك بتلغى الدروس علشان النت

فلاء


دى فلوس يا نتى


إديها فلوس تديكى راحة


هههههههههه


وشكرا على إهداء التاج


كدة بقوا 5 فى عين العدوا


ربنا يقوينى وأعملهم


وعادى بقة
أودى

ody911 said...

أنا رغاى صح


معلش بقة

وعادى بقة
أودى بقة

Reemo said...

محمد العنانى
مفيش شك طبع انا التدوين بيخلى الناس تعرف بعضها اكتر
وبيخلى الناس تتعرف على افكار غيرها وسياستهم
انت نورتنى بمرورك فعلا
ميرسى ليك

___________

رانيا

ولا احراج ولا حاجه يا قمر
انتى اللى بجد سكر ولذيذه
انا مستنيه منك التاج
نورتينى

Reemo said...

horas
بجد انا مش عارفه اقولك ايه
اولا ميرسى على المجامله الجميله دى
ثانيا بجد انا مش عارفه اقولك ايه على التشجيع الجميل ده
بس انا زي ما قلتلك انى بطلت ارسم وبجد حاولت تانى بس فى حاجه منعانى من جوه مش عارفه ايه هى
بس اكيد صدقنى وبجد انا برده مش هزار
انى لو رجعت ارسم تانى
هبعتلك وارسملك الرسومات اللى انت عايزها
ميرسى ليك اوى
نورتنى :)

Reemo said...

اودى
ده انت طلعت مدمن اهو زيى
تكنولوجيا نت كمبيوتر اهو كله فى الاخر ادمان :)
اما بقى حكايه الرسم ده فربنا يسهل وهحاول ارجع للهوايه دى تانى
اما بقى موضوع الدروس ده
فهو انا كنت بلغى علشان بقعد على النت ومش كنت بقدر اشرح
بس خلاص انا ظبطت مواعيدى السنه ده :)
ميرسى ليك يا اودى
مستنيه منك التاج
وعادى بقه :)

شيماء الجيزى said...

اة يا ريمو
تاج وصعب رغم انه فعلا من سؤال واحد
حاضر يا سيدتى الجميله
بس صبرا صبرا
تحياتى

Horas said...

انا متشكر لاهتمامك وردك السريع علياده وان دل يدل انسانة مهذبة محترمة
بصي بقي انا مصر اننا نحاول نعمل تابلوه دلوقتي بجد لازم نحاول
حبة صبر وحبة حماس ولو عاندنا نقدر نفوت بجد اوعي تسمسلمي لأي احساس سلبي لان انا متأكد ان الإرادة الداخلية كبيرة جدا لكن النفس بتميل لما تهوي في وقت التفكير وانت هواكي ناحية مش قادرة لكنك ودون ان اعرفك قادرة
لازم نساعد بعض لازم لازم لازم
وانت الي منوراني برودك واهتمامك بيه
ربنا يسعدك اوقاتك

Reemo said...

شيماء
هو صعب وممكن يكون طويل كمان شويه لو الواحد اتكلم بالتفصيل
بس اكيد انه جميل ان الناس تعرف بعضها
انا مستنيه اجاباتك يا قمر
منورانى
____________

horas
ميرسى ليك انت لاهتمامك بجد
وصدقنى فعلا انى مش حاسه انى عايزه ارسم خالص فىالوقت الحالى
وللاسف ان الرسم ده مش بيجى غير فى اوقات معينه
وصدقنى فعلا انى اول ما هرسم
هرسم بورتريه ليك
وعلى فكره انا زرت مدونتك
ولقيتها لطيفه
ميرسى ليك جدا
نورتنى بجد

Horas said...

انا الي متشكر وممكن كمان تتعرفي علي منتجاتنا الي بسوقها الي علي رأسها ألبومات الفنان سامي يوسف
تحياتي للفنانة ريمو

Anonymous said...

ريمو الجميل
شكرا على التاج..و على الكلام الحلو
هو تاج صعب حبتين بس انشاالله اعمله
ميرسى يا قمر

zordeak said...

انا كمان جالى التاج ده من احمد

اجاباتك وهواياتك ممتعة

وبلوجك كمان تحفة

شكله ومضمونه


بجد بجد

سعيد بزيارتى ليه

:)

Reemo said...

horas
تحياتى ليك
________

shymaa
انا مستنيه اجابتك يا قمر
تحياتى ليكى

_______

zordeak

انا اللى سعيده بجد على زيارتك ليا
مدونتك عجبتنى اوى
واكيد هزورك كتير جدا
تحياتى ليك

re7ab said...

ريمو حبيبة قلبى ميرسى على التاج يا قمر
ويمكن السؤال خلانى اتكلم عن نفسى فى شئ

معين محدش يعرفة عنى كتير

وخلانى عرفت هوايات اصدقائى اللى يمكن

لقيت اننا بنشترك فيها فى حاجات كتير

ميرسى يا حبيبة قلبى على التاج

maioya said...

يالهووووووووووووي علي النت
واللي بيعمله
علي مااد الاستفاده منه
بيدمر بردو حاجات كتير اولي
زي الرسم عندك ياريمو
وكمان العلاقات الاجتماعيه في البيت تبقي شبه مفقوده
حاولي ترجعي تاني للرسم

أسوور said...

أول مرة آجى ألاقى عنك تاج
طب كويس
عموما قريت التاج وعرفتك شوية
وتجولت فى مدونتك الجميلة والرقيقة البسيطة السهلة
تحياتى

khaled said...

احنا بجد عايزين حل لموضوع الكمبيوتر ده دى اصبحت مصيبه جديده اتغلغلت جوانا لغايه لما امتلكتنا انا حاسس انه قضى على معظم الانشطه الى بنعملها
بجد والله كل المواهب دلوقتى فى الرسم اتحولت لمواهب فى فن الجرافيكس كل ترفيهنا بقه على المنتديات والبلوجات
اصدقائنا الى بجد اصبحم على النت فقط
شغلنا انشاء الله هيبقى اكيد على الكمبيوتر والنت
وجود الكمبيوتر بقه اساسى فى اى بيت
ربنا يستر

Reemo said...

رورو
فعلا احنا طلعنا شبهه بعض فى حاجات كتير اوى
مش بقولك شكلك هتلطعى توأمى فى الاخر
بس احلى حاجه ان الناس تعفك اكتر
لانك بجد شخصيه تستاهل ان كل الناس تعرفها
نورتينى يا حبى (K)

_______________
مى

فعلا انت ده مساوءه كتير اوى
بس ده ميمنعش برده انه ليه فوايد كتير
كفايه ان الانسان عرف عن طريقه شخصيات بجد
اثرت كتير فى حياته وبقت هى الاساس
نورتينى

Reemo said...

ياسمين
انا بجد مبسوطه اوى بمرورك عليا
بجد بيدل على انك شخصيه محترمه وجميله فعلا
وميرسى اوى لكلامك الحلو ده
تحياتى ليكى يا قمر

______________

خالد
فعلا النت ده اتغلغل بصوره صعبه فى حياتنا
وبقت كل امور حياتنا متعلقه بيه
بقى فعلا وجوده اساسى فى كل بيت ولكل انسان
تحياتى ليك

smraa alnil said...

حتي انتي التاج دة جالك

ارحمنا يارب من التاجات دي

بس عارفة انا كمان كنت برسم

وبحب الرسم بس ربنا يسامح اللي كان السبب بقي

بس اجابات تحفة

كدة يبقي مبرمج حر قضي علي نص المدونين بالتاج دة
ولما اعمله ان شاء الله هخلص علي النص التاني :))

انتي ايه اخبارك بقي

Reemo said...

وانا بعت للى فاضل يا سمرا
يلا اى خدمه
انا تمام زى الفل
انتى عامله ايه ؟

عبدالله said...

اجابه جميله ريمو عن تاج لذيذ
هوا فعلا الانترنت بقي هوايه جزء كبير من البشر بس يا تري ليه ايه الي فيه خلي ناس كتير كده تتشدله اعتقد انه بيعمل عالم افتراضي تاني نقدر نعيش فيه بدون ما نواجه الحياة بوشنا المعروف انا برضه عندي الادمان ده من اكتر من تسع سنين
:))
بس دايما بنصح صحابي ابعدوا عن الوهم و اندمجوا شويه في الحياة قبل ما تفقدوا القدره علي التوائم معاها

شكرا علي زيارتك لي
و بلوجك فعلا جميل انتي انسانه عندك زوق عالي

تحياتي

dandana said...

رسم....
مج نسكافيه....
فيروز....

والله انتى انا

حتى انتى قولتى كدا عندى...
الكومبيوتر بقى
اعتقد قليلين اللى بقدروا يفلتو من ادمانه....
حاولى بس تسيطرى على الموضوع

Reemo said...

عبدالله
فعلا ادمان النت بقى مشكله كبيره
ويمكن الواحد بيعمل فى العالم الافتراضى ده
حاجه مش بيقدر بيعملها فى العالم الحقيقى
جايز ده سبب حبنا للعالم ده
انه بيحقق احلامنا اللى احنا مش قادرين نحققها فى الواقع
انا اللى مبسوطه اوى بزيارتك ليا
تحياتى ليك:)

Reemo said...

دندونه
انافعلا اخدت بالى انا فى تشابهه كبير بينا
وفعلا النت ده سحبنا من عالم
ربنا يستر على اللى جاى
انا بجد سعيده انى يبقى فى تشابهه بينى وبين قمر زيك
تحياتى ليكى يا قمر

nour said...

eshta ya reeemoooo
اوكى يا بنتى هرد على التاج بس اصبرى عليا شويه
و الله انا كمان نفسى اعرفك اكتر و بما انك بتحبى الرسم احب اقولك انى بدرس فى كليه فنون جميلة
اى خدمه يا معلمه
:))))

Reemo said...

يا بختك يا نور
تصدقى كان نفسى ادخلها الكليه دى
وفعلا جيبت مجموعها
بس للاسف حصل عندى ظروف منعتنى انى ادخل الكليه دى
ودخلت تجاره
يلا اللى حصل
براحتك يا قمر
بس خليكى فاكره انا مستنيه التاج
تحياتى وقبلاتى :)))

Yassmina said...

ana b7b elrasm brdo wbrsm kteer bs amakn w karkateer
brdo msh b3rf arsm ghir blrosas
3arfa elnet f3lan fe 7agat kteer ana sa3at b23od bl 5 aw 4 sa3at mtwasel

anty cute aweeeeeeeeeee
i love you

Reemo said...

ياسمين
انا للاسف مش بعرف ارسم مناظر طبيعيه او اماكن
مش بعرف غير بورتريه بس بالرصاص او الفحم بس
انتى بتقعدى مده قليله اوى
انا بقعد يا بنتى بال10 ساعات او اكتر متواصل
انتى اللى عسل ورقيقه وجميله يا ياسو
انا كمان بحبك اوى