Thursday, March 29, 2007

ادينى فى الهايف وأنا احبك يا ناننس

فى البوست ده انا مش هظبط كلامى ولا هقعد انمق الكلام ورتبه زيى كل مره لانى بجد متغاظه جدا
انا قليلا ما بخرج عن هدوئى وبتعصب وبلاقى نفسى معترضه ومتغاظه كده
بس انا هحكيلكم عن اللى حصل بجد لانى جايز اكون انا اللى مش طبيعيه
الموضوع ان من يومين كنت على الماسنجر ولقيت واحده صاحبتى بعتالى بلوج وبتقولى
"شفتى البلوجات المشهوره يا بنتى "
دخلت ابص على هي قصدها ايه لقيتها قصدها على ان البلوج عدد الكومنت فيه معدى ال150 كومنت
انا قلت ايه ده ده اكيد الموضوع فظيع او مهم اوى لدرجه انه يجيله كل الكومنت ده
وان كل الناس دى تعدى عليه وتضيع من وقتها وتكتب كومنت
اجى اقرى الموضوع الاقى حاجه اقل ما يقل عليها انها تافهه وموضوع ملوش معنى
شخص بيحكى عن موقف حصله منتهى التفاهه اللى فى الدنيا
ومستخدم الفاظ اقل ما يقال عنها انها سوقيه ومبتذله ولا تليق بمستوى تعليم الشخص ده
بس بجد اللى انا مستغرباله اكتر ان الكومنت على الموضوع ده ماشيه على نفس الوتيره
برده كلها سوقيه ومبتذله وهايفه جدا
والاغرب انا فيها ناس بجد مش اتوقع منهم انهم يعلقو او يضيعو وقت فى حاجه تافهه كده
ناس اصحاب كلمه وليهم مواضيع اكثر من رائعه فعلا
ومع ذلك داخلين يحطو كومنت على موضوع زى ده انا مش فاهمه دى مجامله
ولا دى تضيع وقت ولا هى طلبت معاهم تفاهه
انا مش بقول ان الناس مش تهيس شويه او تهزر
بس مش معقوله بجد ان الهزار والتفاهه تبقى هى رقم واحد
وتبقى هي مثال الشهره على المدونات
بقى موضوع تافهه وهايف وملوش معنى وسوقى ومبتذل زى ده
الناس دى كلها تدخل تقراه وتحط كومنت عليه
وفى ناس تانيه طالع عينها وبتعصر دماغها علشان تكتب كلمه جيده
او توصل معنى فى نفسها او توصل احساس داخلى
ويمكن محدش يكون بيقرى اللى بيكتبه الناس دى اصلا
وممكن لو حظهم حلو شويه كام واحد يعدى ويقولهم جميل والله
انا اعرف ناس بجد بتكتب كلام رائع وملوش حل
ومع ذلك محدش بيدخل يبص عليهم ولا يقولهم انتو فين ولا هما بيقولو ايه اصلا
فى حين ان التفاهه والهيافه تاخد كل الاهتمام والتعليق ده
الثقافه والرقى والكلمه المحترمه تتعامل بالاهمال ده
والهيافه والتفاهه تبقى هى المشهوره وتاخد اعلى نسبه فى الكومنت وتبقى مثال النجاح
اما فعلا حاجه تغيظ وتفقع المراره
بس على راى مزازنجى :" ادينى فى الهايف وانا احبك يا ناننس "0

58 comments:

nour said...

عندك الف حق
بس ساعات بيكون اللى كاتبين دول اصحابك فعلا فى الحياة و بيكون من كتر ما هما اصحابك مواقفهم دى تهمك اة ليها بعد محدش يفهمه غيرهم
فى الحالة دى بس بكتبلهم
بس بجد مدونتك جوها جامد اوىىىىىىىى شيك بجد
رائعة

dandana said...

معلش يا ريمو....
واضح انك مضايقة اووووووووووووى....
بس زى ما قالت نور ممكن يكون بعض التعليقات لناس بسبب قربهم من الشخص دا...وانه يهمهم اوى

بس برضو مايبقاش مبرر للتفاهة

المدونة حلوة اوى....فاشونابل بجد

Anonymous said...

وصفه المدونه المشهوره
كلام فى الهايف
الفاظ سوقيه
شويه هرتهله وتهيسس
النتيجه
مدونه مشهوره
دى وصفه سهله
دى وصفه هايله

Reemo said...

ش عارفه ليه يا نور مش حاسه ان ممكن يكون الاصحاب كده
اصلى دايما الشخص بيصاحب الشخص اللى شبهه
ومش معقوله يكون حد كويس اوى يصاحب حد سوقى اوى
بس هرجع واقولك كل شئ جايز
بس انا اعتراضى ان ممكن اقول موقف حصلى او اهزر شويه بس مش بالالفاظ السوقيه والطريقه دى
منورانى يا قمر

_______________

انا مضايقه يا دندونا لان الناس شايفه ان المدونه بكده تبقى نجحت
وده بيبقى على حساب ناس تانيه
واكيد ده مش مبرر التفاهه
ميرسى يا قمر لمرورك
منورانى

_____________

الشخص اللى مسبش اسمه
مفيش اسهل من كده وصفه للتفاهه والهيافه
بس فى النتيجه مشهور بالهيافه ونعم الشهره
منورنى رغم انك مسبتش اسمك

Reemo said...

لشخص اللى دخل وسابلى كومنت شديد اللهجه
وكان تعليقه مش على المدونه ولا على الكلام اللى قلته لا كان تعليقه على الصور
انا فعلا مش بقصد حاجه بالصور دى
ومن وجهه نظرى شايفاها عاديه جدا
بس بما انك الشخص المليون اللى يعلق على الصور
والشخص المليار اللى يقولى الناس هتفهمك غلط
وبما انا الناس نيتها سيئه دايما
بناء على طلب الجماهير
انا هغير الصور
علشان اترحم من التعليقات اللى ملهاش لازمه دى والناس تركز شويه فى الكلام اللى بكتبه

maioya said...

علي فكره انا دخلت مدونه
وكان فعلا اسمها نفسه مش مظبوط
بس قولت يمكن للفت الانتباه ليس الا
وزي ماانتي قولتي كان الكلام مجرد تفاهه وهيافه
وقله ادب كمان وكل الكومينتز
كان بنفس الاسلوب
مش مهم حد يدخل مدونتك عشان يقري اللي فيها
المهم انتي بتكتبي وخلاص وبتطلعي اللي جواك
لو حتي مش هتلاقي اللي يسمعك
كفايه انك بتسمعي نفسك وقادره تخرجي حاجه كويسه
علي العكس الناس الفاضيه دي
كملي وغيرك يكمل طالما بتكتبي حاجه
مش تتكسفي منها او حاجه غلط
كفايه احترامك لنفسك واحترام الناس ليكي
حتي لو كانوا اتنين بس او حتي واحد اللي بيشوف

بالنسبه لحكايه الصور
كل واحد حر في اختياره
صوره انتي ممكن تشوفيها كويسه
حد تاني يشوفها مش كده
حاجه نسبيه يعني
انت اخترتتيها خلاص سيبيها طالما مرتاحالها

meroooo said...

انا ماكنتش متخيله ان الموضوع اثر فيكي كده بس زي ماقوتلك زي مافي بلوجات تافهه في بنائه وزي مااحنا نفسنا نشوف كلام تقيل ويكون كله احساس وعقل محتاجين حاجه فاكهيه زي ماقوتلك وبعدين مين عارف بكره احنا كمان نبقي اصحاب اشهر بلوجات ونبقي سايت ياسيتي وكفايا احساسك انتي ماتبصيش ليهم وعلي الناس اللي انتي مش متوقعه انهم يردوا عندهم او في الاشياء التافهه هما محتاجين شويه الخروج عن الملوف مش اكتر
وربنا يستر علينا وعليهم

Reemo said...

يا مى اكيد الواحد حتى لو محدش عدى عليه اصلا بيكتب
وده اللى خلى الناس اللى بتكلم عليها لسه بتكتب للنهارده
الواحد مش مستنى ان الناس تقولو جميل علشان تكتب
بس بجد الواحد بيضايق لما بيلاقى ان الكلمه الهايفه الناس كلها تتشد ليها
والكلمه اللى ليها معنى محدش يبصلها
اما موضوع الصور ده فانا قلته كتير بصراحه لغايه ما زهقت
انى انا شايفه من وجهه نظرى ان الصور كويسه
وانى حره فى اختيار الصور اللى احطها فى المدونه عندى بس مفيش فايده مبترحمش من الكومنت
فقلت اريح دماغى واغيرها جايز انها تعباهم اوى اريحهم علشان يريحونى من الكومنت اللى ملهاش لازمه
منورانى يا حبى
(F)
__________
اميره انتى عارفه من يومها ان الموضوع غاظنى ده مش جديد
وقلتلك الناس من حقها تهزر وترفه عن نفسها بس مش معقوله انها تهزر بالسوقيه والتفاهه دى
اصل دايما الانسان بيبان من طريقه كلامه واسلوب هزاره
بس اكيد الهيافه والسوقيه دى مش هيا النجاح ولا بكثره اللى علقو تبقى هى كده مشهوره
ميرسى لمرورك

Anonymous said...

انا فاهم كويس اللى بتقولى عليه ده
بس انا عايزه افهمك حاجه واحده ان الدنيا فيها مجاملات
وعلشان الناس تعلق عندى لازم انا كمان اردلهم التعليق زى المجاملات اللى فى حياتنا بالظبط انتى لازم تجاملى فلان علشان فلان ده يجاملك
ودى نصيحه بناء على خبره كل انسان كلميه بلغته يعنى الكويس كلميه كويس والمبتذل خليكى مبتذله معاه علشان تقدرى تستمرى
انا مش هرد باسمى علشان انا فعلا ممكن ارد فى مواضيع هايفه رغم انها مش بتتماشى مع كتاباتى بس زى ما قلتلك المجاملات فى كل حاجه
مدونتك جميله وناضجه

الهادي كملاوي said...

بصراحة ليش .. انت بتحرقي دمك كتير يا اختي .. وخاصة أنت ذكرت عبارة مهمة جداً هي أن الموضوع سوقي والكومنتز أيضاً مثله .. خلاص يعني الموضوع صادف هوى بلوجرز معينين .. عشان كدة حقو لا ترفعي ضغطه كتير .. نحن محتاجين نتمتع بكتاباتك .. وشكرا

re7ab said...

بجد يا ريمو عندك حق فى كلام
انا شوفت مواضيع بتعدى ال 200 كومنت
وبجد استغربت لما بقرا المواضيع دى من اسلوبها والكلام اللى فيها
ومع ذالك الكومنتز بيبقى كبير جدا
بس اكيد اكتر الردود بتكون من اصدقاء يا ريمو يعنى مجرد مجامله
وفى ناس بتعز الهيافه ومالهاش فى المواضيع الهادفه ودول كتير اوى واكيد حاجات زى دى لازم تعجبهم
وانا معاكى فعلا ان فى حاجات بجد تغيظ فى المواضيع اللى بتنزل بس عادى يا ريمو هى فى ناس بتحب كده
ميرسى ليكى يا قمراية على كلامك
الجميل اللى انتى بتكتبيه

Anonymous said...

فعلا الكلام الهايف بيجي عليه كومنتات كتير...ممكن تكون الناس بتفك عن نفسها شويه فبتسيب كومنت..ده حتلى ببلاش...:):)...انت نورتيني امبارح بس معرفش شوفتي التوبيك اللي عن الكومنات ولا لا....
بس بجد مدونك جميله اوي و ولا يهمك..هدي نفسك كل واحد بياخد نصيبه..:'(..قلبتي عليا المواجع يا شيخه...
اسمك حلو على فكره

ody911 said...

أقولك على حاجة يا ريموا

أولا البلوج بتاعك هايل فعلا ودى مش مجاملة

انا وصلت هنا بالصدفة

وعادتا بقرأ آخر موضوع فى البلوج
وبكتفى بية

بس لما قريت الموضوع دة

حسيت غنك متغاظة أوى

مش قصدى إساءه

لاء

كل الفكرة إنك شايفة إنى الناس بتتكلم فى تفاهات


طبعا ممكن تكونى مكملتيش قراية فى البلوج

يعنى مقرتيش كل مواضيع المتهم

علشان تقولى إنوا ميستحقش إنى الناس تدخل وتعلق


وممكن كمان يكون بيهيس

زهق من الكلام الجميل المتزوق

وزهق من الفلسفة والحيادية

وزهق كمان من الحال والأمر المحال

يمكن حجات كتيرة أوى

يمكن يكون زهق من الكلام فى السياسة

وزهق من الكلام عن الأدب والشعر والقصص وووووووو




عموما انا عاوزك متحكميش على حد من موضوع واحد بس


لانى الناس بتتغير

وتصرفاتها كمان بتتغير يوم بعد يوم


وعادى بقة
أودى

Reemo said...

الشخص المجهول اللى برده مسابش اسمه
انا معترضه معاك فى رايك لان مش صح ان تعامل كل واحد بطريقته يعنى مثلا لو قابلت رقاصه اقرص زيها مش صح طبعا
انا ليا طريقتى واسلوبى وبتعامل بها مع كل البشر ولو اللى قدامى مش متقبلها مش لازم نتعامل اصلا
ميرسى لمرورك
منورنى
____________

فعلا عندك حق يا زين
الطريقه دى بتقابل هوى بلوجرز معينين
ميرسى لمرورك
نورتى واكيد هعدى عليك

Reemo said...

رورو حبيبه قلبى
والله عندك حق فى ناس كده تعز الهيافه
وتحبها زى عينها
ميرسى يا حبى لمرورك (K)

Reemo said...

ارتعاشات
بجد ميرسى على مجاملتك
انا مشفتش البوست اللى بتتكلم عنه
بس اكيد هدخل اشوفه وهعلق عليه كمان
ميرسى اوى لمرورك
نورتنى بالكومنت الجميل ده

_____________________

اودى
على فكره لفت نظرى كلمه عادى بقه دى
انا مش من النوع اللى بحكم على الناس من موقف معين او من بوست واحد
ولما بدخل على بلوج شخص جديد بقراله اكتر من بوست
علشان اقدر احدد انطباعى عن الشخص ده
واحدد اذا كان يستحق الاهتمام والمتابعه ولا لا
وده الى عملته لما شفت البلوج الهايف ده
واكدلك انه كل مواضيعه من النوع الهايف ولو صادف موضوع ليه معنى برده بتلاقيه يشتمل على الفاظ سوقيه ومبتذله كانها ماركه مسجله لصاحب البلوج
نورنى واسعدنى مرورك اوى
ميرسى ليك

Anonymous said...

ايه ده...انا بقلب في المدونه لقيتك حطيتي شعر للرائع فاروق جويده...الرائع...و كمان من اروع ما كتب بعنوان عينيكي عنواني...انا بعشق القصيده ديه...كنت هسبلك كومنت هناك بس خفت متوفيهوش...بجد احييييييكييي بحراره

Anonymous said...

لا يمكن ان نطلب من كل الناس ان يكونوا على قدر عقولنا او ان نظن ان ماقد يهمنا بالضروره يجب ان يهتم به غيرنا.. كما أن الحكم على هيافه الموضوع او عدم اهميته لا يمكن ان يكون من خلال غير صاحبه..فما قد نراه نحن بغير جدوى..قديكون عند صاحبه شديد الاهميه .. ايضا فكره التدوين تحتمل مثل هذا وذاك.. فلماذا نضيق على أنفسنا..
..............................
مدونتك لطيفه

Anonymous said...

عندك حق

بس على فكرة ساعات بيكون في مشكلة فينا

اننا دايما بنعتبر ان الحلو لازم يكون كويس دايما و الغلط لازم يكون وحش و مفضوح دايما

زي ما بتشوفوا في الافلام الدينية في مصر لما تلاقيهم مطلعين ابو جهل ابو جهل فعلا مشعث الشعر و بدين و شكله وحش و تلاقي الصحابة طالعين نور الشريف و ايهاب نافع فممكن لو اكتشفتي ان ابو جهل ده كانت خلقته جميلة او ان واحد من الصحابة شكله مش جميل قوي

يعني على فكرة الهيافة و الغلط و التفاهة لو اتعملوا باحتراف بيكون تأثيرهم واسع و انتشارهم رهيب و في نفس الوقت الجيد و النقى لو اتقدموا باهمال ماحدش بيتابعهم

فلازم يكون المجهود من ناحيتنا برضه علشان نعلق بذوق الناس

بس بيبقى على اقل الظروف دايما احترامك لنفسك لما تحسي انك بتكتبي عن اي موضوع بطريقة صح و اسلوب جميل بعيد عن الشهوات الضارة

AHMED SAMIR said...

والله يا ريمو موضوع الكومنتس دي ما فيهاش اي حاجة حتى لو كان الموضوع هايف
بمعنى اني اشوف ان الشخص اللي دماغه كبيرة وتستوعب كويس بيكون قادر انه يتعامل مع الثقافة والمواضيع الجامدة المجعلصة دي وفي نفس الوقت يقدر يتعامل في الهيافات برضة.
بمعنى انك ممكن تقعدي مثلا تسمعي حوار هيكل على الجزيرة وبعد ما يخلص بتتفرجي ع اللمبي
مش بتحصل؟
هي دي برضة البلوجز ....في بلوجز بتكون قمة في الجدية والموضوعات الساخنة وبلوجز تانية بتكون قمة في التفاهة للاستمتاع والترفيه بس

Reemo said...

ارتعاشات
ميرسى بجد على انك تابعت المدونه
انا بعشق القصيده دى بجد
وعلى فكره اى كومنت ممكن تسيبه فى اى مكان انا بتابع عن طريق الميل
ميرسى ليك مره تانيه
_________

حامد
انا معاك ان فى الاهتمامات بتختلف
وان ممكن حاجه اشوفها انا مهمه انت تشوفها هايفه
بس فى حاجات مش بيختلف عليها اتنين انها هايفه
وخاصه ولو كانت بتتضمن بعض الالفاظ السوقيه وده اللى بتكلم عليه فى البوست
ميرسى اوى لمرورك
شرفتنى بزيارتك

Reemo said...

kimexlilo
والله الواحد بيعمل اللى عليه
وبيحاول كتير بس فى ناس مش لاقيه الفرصه انها تظهر
فى حين ان اناس تانيه بتظهر من غير ما تكون تستحق الظهور ده
اسعدنى مرورك جدا
نورتنى
______________

سمير
انا قلت فى البوست ان من حق الناس تهيس
ومن حقها تهزر وتضحك
بس مش يبقى الاهتمام بالهيافه
ومفيش جد خالص
ده قصدى نوازن ندور على ناس بتكتب بجد ونهتم بيهم نسيب اى كومنت ولو حتى جميل او رائع او حلو اى حاجه
مش يبقى الاهتمام بالهيافه وبس
نورتنى

heba labeb said...

اولا اسفة اوى ان الكومنت متاخر كدة
بس معاناة على ما يفتح
بصى فعلا الى انا شوفتة دة اسمة استهبال مش هيافة كمان
لانة اساسا قلة ادب قبل ما يكون حاجة تافهة
معتقدتش ان حد بيكون بيكتب كدة ومش هو دة اسلوب الحياتى العادى
كل انسان بيكتب او بيدون حاجة بتكون بطريقتة واسلوبة الشخصى
وان دل على شىء يدل ع عدم احترام
مش تهييس
اصل بردة التهيييس لة حدود يا ريمو
وانا عن نفسى لو اعرف حد كدة مش هفكر اصلا انى ارد
مش عشان صاحبى اجاملة
وانزل من نفسى اوى كدة
اى كل واحد حر وكل حاجة بس بردة فى حدود الادب
ومعلش يا ريمو مش هقول ع الكلام دة غير قلة ادب وقلة احترام
مش تهيييس

بجد بوست تحفة
وطبعا كان لازم يكون دة رايك يا حبى
luv u ya 2;by

محمد عـنـانـى said...

انا مش عارف الكل مهتم با التعليق اوى ليه فى ناس بتقول انو قلب المدونه بس انا شايف ان المدونه بتعبر عن شخصيه صاحبها عن ايمانو وفكرو
مش الهدف الكومنت انا كنت هلغيه المهم اول ما ضهر الشات كان استخدامو فى كل ما هو تافه وحقير وبعدين الناس وقعت التافهين وبقيا النافعين وغالبا البلوجر برضو كدى ده فى مدونات اقل ما يقال عنها معفنه وهى دى الدنيا كلها اختلافات
موضوع حلو

Anonymous said...

مفيش حد مش بيهمه الكومنتز على مواضيعه
وخاصه لما يكون بيكتب شئ ذو قيمه
او عايز يوصل فكره معينه او كلمه قالها لاكبر مجموعه من الناس
وكمان لما يلاقى الكومنتز كتير على حاجه هايفه بيزعل اوى

ody911 said...

وإنتى طيبة

وشكرا على الزيارة

وعادى بقة
أودى

zordeak said...

ياما هتلاقى من ده على فكرة


ريحى دماغك علشان متتعبش


الناس عارفة وشايفة

المحترم بيفضل محترم

والهايف عارف انه هايف وبيكتب كلام هايف


كون بقى ان الناس تعلق عليه

فانتى قلتيها

ادينى فى الهايف

Anonymous said...

بس هوا غلطان

حزيــــــــــــــــــن said...

هاى ريموو أسلوبك بيفكرنى بواحده اسمها اميره حسن بتكتب فى الدستور انا مليش اوى فى عالم التدوين بس دخلت مدونتك لما سبتيلى كومنت عندى انا صاحب مدونة مزاج فاكراهاmazaag.blogspot.com
او يمكن لنى مش بدخل كتيير وادور بس انا متفق معاكى الناس بتدور على اى حاجه وخلاص ومادمت بتتوافر فيكى صفات الكاتب فلا تبحثى عن من يقرا الجيد او غيره ولكن لا تتخلى عن الكتابه

Reemo said...

هوبا حبيبه قلبى
ولا يهمك يا حبى انتى تعلقى فى اى وقت المدونه كلها بتاعتك يا قمر
انا وريتك البلوج اللى قصدى عليه
وانا معاكى ان دى قله ادب مش هيافه بس
وانا كمان مش متخيله ان يكون فى شخص هو ده اسلوب حياته الطبيعى يعنى بيتكلم كده وبالطريقه دى
منورانى يا حبى
love u
________


محمد العنانى
التعليق مهم بجد لما بتكون عايز توصل كلمه للناس او رايى معين
اكيد الواحد بيكتب لنفسه
بس برده ده مش يمنع ان مشاركه الناس ليه فى كتاباته بتسعده
نورتنى

Reemo said...

الشخص المجهول رقم 3
انا متفقه معاك فى الراى ان مفيش حد مش بيهتم بالكومنتز
وخاصه لما يكون حاجه مهمه ويلاقى الناس متجهه ناحيه الهيافه
نورتنى
_____

اودى
ميرسى اوى انك رديت عليا هنا
وانتى اللى شرفتنى بزيارتك لمدونتى فعلا
ميرسى ليك

Reemo said...

zordeak
عندك حق فعلا المحترم بيفضل محترم
وحتى لو الناس بترد على الهايف بس كفايه انها واخده عنه الفكره دى
ميرسى لمرورك
نورتنى
__________

اثناء الحياه
ولو انى مش فاهمه هو مين اللى غلطان
لكن برده نورتينى بمرورك

__________

حزين
انا فاكره مدونتك
فعلا عجبتنى وسيبت فيها كومنت
ميرسى لزيارتك
واكيد مش هتخلى عن انى اكتب
وانا مبسوطه انى عجبتك كتابتى
ميرسى ليك
نورتنى بالزياره

شيماء الجيزى said...

طبعا انا معاكى ي ريمو

وحتى لو حبينا نكتب بشويه تهييس ولا ضحك وهزار متوصلش لدرجه قلت الادب
والابتزال ده
كلنا طبعا شوفنا البلوجات دى ...بس حكاية ان ناس عارفين انها ليها كلمه
بترد بنفس الشكل...حتى لو كانوا اصدقاء
شكل ايه ده الى رد باسلوب مش كويس ومبتزل ووقح؟

انا اكيد متغاظه زيك
بس مش عشان دول بيوصل عدد الكومنت عندهم اكتر من ميه
لان ببساطه انا يكفينى الناس الى فهمت كلامى
هما دول المهمين ...ولو زاد عددهم اكتر
هتبسط

يمكن متغاظه عشان الناس الى تاعبه نفسها على كلمتين هايفين

ريمو ..مدونتك جميله جد
تحياتى

Anonymous said...

ريم... دى اول مرة ازورك وبجد عندك حق فى الى قولتيه.
انا بلوجريه جديده و شوفت الى قولتيه و فعلا مفيش حد بيعبرنى غير شخص واحد متكرر واللى بقى فعلا عزيز عليا..لانه الوحيد الى مهتم.. بس هقولك حاجه .. على راى ناريومه المهم الواحد يكتب و خلاص , يطلع حاجه جواه من الجايز انها تكون كاتمه على نفسه. ويمكن الاخ بتاع الكلام السوقى ده الكلام كان واقف على نفسه وكان لازم يطلعه :) مدونتك جميلة

إبراهيم محسن said...

بصي يا ريمو

عندك حق في كلامك وكل حاجة بس تحبي أكلمك بصراحة.. صح

مفيش حاجة اسمها انك تتضايقي من مدون كاتب عن موضوع تافه وبشكل سوقي.. وكمان تقولي على اللي معلقين عنده كده.. عارفة ليه.. لأنه ما أجبركيش تدخلي مدونته وتقري.. مري على اللغو مرور الكرام

بصي مش هتلاقي حد مر على مدونات سيئة قدي.. وصل الأمر للصور الإباحية بشكل يجرح لما يجيب مجموعة عرايا حول الكعبة استغفر الله العظيم.. وسباب في الأديان والإسلام والأنبياء وخاصة سيدنا محمد وآل بيته بشكل والله يجرح واحد مسيحي بيقرا.. هقولك إيه ولا إيه

اما بقى أبو كلام سوقي وتافه والناس اللي بيعلقوا عنده على موضوعات تافهة دول متتكلميش عنهم ومري على اللغو مرور الكرام.. وبعدين انتي اسلوبك ومواضيعك كويسة.. متضيعيش وقتك في الكلام عن ناس تانية .. اوك
ارجو ان كلامي يكون مش ضايقك.. اوك
سلام

~ Bato0ot ~ said...

bosy ya reemo enty shaklek z3lana awy :) mt3sbeesh nafsek keda :D
enty btktby kalam kwys msh 3ashan ay 7ad yedeky comment ! fa myfr2sh el 3adad yefre2 el quality!
sa7?
w b3den fe3ln momkn yokono so7abhom awy
w b3den enty khalety 3ndy fodol ashof el blog da :D?

Horas said...

بداية اسعد بدخول مدونتك اللطيفة للمرة الأولي
تعرفي ان مجرد انك تتغاظي وتضعي من وقتك جزء تعلقي علي هذا الهزل وفراغة الوقت والعقل مش مطلوب بجد عندك حق ويا ريت نشتغل الأشياء الي في ايدنا بشكل أكثر ايجابية والا طول عمرنا هنفضل كده ونستاهل ما يحدث بنا
تحياتي

علي الالفي said...

و الله عندك حق و مليون حق
و مرة اتعرفت على واحد منهم و سالته ليه القذارة اللي انت بتقولها جاوبني بمنتهى البلاغة اللي جت في دماغه


"في الاباحة متعة لو تعلمون"
ياعععععععععععععع
بس هايجيلك يوم و تبقى مدونتك ماللي فيها 110000000توقيع
تحياتي

انا اللى بالامر المحال اغتوى said...

هقلك على حاجه من واقع اللى لفيته وشفته فى المنتديات والبلوجات ود راى الاغلبيه تقريبا
انه اللى بيرد غالبا عشان كاتب الموضوع صاحبه
وياما شفنا مواضيع فمنتديات مهمه جدا مفيش عليها ولا رد!!!!
وده ان يدل على مدى تفاهة وتدنى الذوق العام
قولى يا باسط
ودمتم يا عسل

يا مراكبي said...

أحب أعلق على الموضوع ده لأني لاحظت إنه شاغل ناس كتير

الرقاصة اللي بقت مليونيرة ده مش دليل النجاح .. ولا المدرس الشريف اللي ما بيديش دروس خصوصية فاشل

مش معنى إن فيه بلوج تافه بيجيله 500 تعليق إنه يكون ناجح كده أبدا .. البلوج الناجح هو اللي يأثر في الناس ويضيف قيمة حتى لو ما جالوش ولا تعليق

المدون اللي عنده رسالة لازم يكون بيعمل كده لوجه الله ومايهموش كام واحد يعلق .. المهم كام واحد يتعلم حتى لو ما يعرفهمش

ياريت تقري البوست ده وإنت تفهمي قصدي بالظبط
http://yamarakby.blogspot.com/2006/11/blog-post_29.html#links

Reemo said...

شيماء
نفس رايى محدش قال مش نهزر شويه
بس مش معقول علشان نهزر نقول كلام والفاظ سوقيه
بعدين اللى بيكتب كلام هايف معتقدش انه بيتعب اصلا
انتى اجمل يا قمر
نورتينى فعلا بزيارتك
__________

shayma
انا شفت مدونتك فعلا ولقيتها جميله اوى
انتى لازم تكتبى يا قمر
لان بجد كتابتك حلوه
تحياتى يا قمر

Reemo said...

براهيم
اكيد طبعا مش هزعل منك
رايك بحترمه اكيد
انا عارفه ان محدش اجبرنى ادخل مدونات زى دى
بس انا شوفتها فعلا
وحسيت باحساس معين
انا مش علقت على المدونه هناك
لانى متاكده ان تعليقى هيتمسح
ومش هيعجب صاحب المدونه
علشان كده علقت عندى هنا
اكيد رايك مش هيضايقنى ابدا
وميرسى لرايك فى مدونتى
نورتنى فعلا
__________

batooot
مفيش اكتر من البلوجات دى ياقمر :)
بس انتى خديلك لفه كده وانتى تشوفى العجب
اكيد المهم انى بكتب بس برده
الواحد لما بيحس ان فى مشاركه لكتابته
بجد بيبقى فرحان
زى مانا فرحانه بتعليقك كده :)
نورتينى يا جميله

Reemo said...

horas
بجد والله ساعات الواحد بيكبر دماغه
بس فى حاجات فعلا بتغيظ الواحد
وبتخليه يخرج عن شعوره ويتكلم
بس الحمدلله انهامش بتحصل معايا كتير
ومش فى اى موضوع الا لو كان مستفز بجد
ميرسى لمرورك
نورتنى
_________

على الالفى

تصدق انى صدمتنى بتعلقيك
بجد انا مش متخيله فعلا
ان فى ناس بتفكر كده
ايه التفكير المقرف ده
بس هنقول ايه الناس دى موجوده فعلا
ميرسى اوى يا على لمرورك
نورتنى فعلا

Reemo said...

آيه (حدوته مصريه)0
انا بجد مبسوطه انك هنا
فعلا وحشتينى جدا
ووحشنى اشوف ردودك على توبيكات ليا
وفعلا عندك حق ياما شفنا مواضيع مهمه ومكانش عليها ردود
ومواضيع ولا اتفهه منها وعليها ملايين الردود
على رايك يا باسط
ميرسى يا قمر
بجد نورتينى
__________

مراكبى

انا معاك ان البلوج الناجح هو اللى بيأثر فى الناس ويضيف قيمه
انا هقرى البوست بتاعك وهسيبلك تعليق فيه
ميرسى اوى لزيارتك
نورتنى:)

shermen said...

والله معاكي حق الهايفه بقت هيه المكتسحه لكن من وجهة نظر إيجابيه المميز قليل عشان يبان
يعني لما الهيافه تبقى كتيررررررررر اوي تلاقي اللي ظاهر ايه المميز
يبقى إحنا الكسبانين

Anonymous said...

طب ما اللي يهيف ويستيهف براحته طالما ده في مدونته اللي محدش مضطر انه يدخلها او يتابعها لو مش حابب ده او حتى ضحكه ، ما احنا بنضحك على ناس عارفين انهم بيمثلوا وبنتبسط وبيقولوا ساعات العن من اللي بيتكتب ، انا مش بدافع لاني اصلا معرفش البلوج اللي قصدك عليه بس اللي ميعجبوش حاجة يعمل غيرها والناس حرة في اللي يعجبهم وميعجبهمش

و...بس

khaled said...

هوا مين الى مات يا ريمو انا موش شايف الموضوع خطير قوى كده الراجل اكيد عنده وجه نظر وحب يعمل شويه قفشات ويضحك الناس موش معنى ذلك انه هايف انتى بس الى رومانسيه والحاجات دى
اقولك نكته: أحول...... سجل في الجيش ...... حطوه في قسم القصف العشوائي

Reemo said...

shermen
فى ناس شايفاها مش هيافه والله يا شيرمن
بس ممكن يكون عندك حق
لما الهيافه تزيد الكويس يبقى مميز
نورتينى بجد يا قمر
انا مبسوطه لزيارتك
ميرسى
___________________

عبد الرحمن

انت قلت كل واحد حر فى اللى يعجبه واللى ميعجبوش
زى ما كل واحد من حقه يستهيف براحته
انا برده براحتى انى اقول ان ده مش عاجبنى
مش كده ولا ايه؟
نورت

Reemo said...

خالد
محدش مات ولا حاجه ومقلتش ان الموضوع خطير
ووجه نظرى ان دى هيافه ممكن غيرى يشفوها هزار
كل واحد ليه منظوره للمواضيع
ةمش عارفه هى الرومانسيه وحشه ولاايه؟
نورتنى

محمد صلاح العزب said...

ده حقيقي يا زعيمة

Horas said...

انا الي متشكر لردك الرقيق ويا ريت بقي تغيري وتوريني حاجه جديدة وفريدة في مدونتك الجميلة

واحـــد مـــــن الـنـــاس said...

والله كلامك صح الصح كمان

وانا سبحان الله

فكرت في نفس اللي انتي فكرتيه فيه اقسم بالله من قبل ما اشوف البوست ده

بنفس طريقة التفكير بالظبط

انا حاسس ان في بيني وبينك قواسم مشتركة كتير خصوصا في موضوع الرسم


على فكرة انا مش بثتثني نفسي من حكاية التفاهة دي

انا ممكن اكتب كلام هايف بغرض السخرية او التنكيت

ولكن ده ميمنعش اني مبقولش رأيي او فكرتي سواء سياسية او فكرية في وسط الكلام

وبوصلها للناس

يعني مش هيافة لاجل الهيافة

لكن تانا فعلا بشوف بوستات الكومنتز بيعدو ال 150


والكلام هدفه مجرد الاضحاك وبس

يعني لا فايدة ولا قصة ولا فكرة

واللي بيغيظني الاقي راجل كاتب كلام مهم وحارق دمه عشان يوصل فكرته للناس

وفي الاخر الناس ميعبرهوش خالص

كانهم بيقولولو روح انتحر

وممكن تكون التعليقات دي حكاية صحوبية
بس برضه مش في كل الاحوال
برضه


وعلى فكرة مدونتك جميلة جدا جدا جدا

وهتلاقيني زائر دائم عندك

اذا مكنش يمانعك طبعا

Reemo said...

محمد
حقيقى جدا
اخيرا ظهرت حمدالله بالسلامه
______________

horas
ميرسى ليك انك متابع
انا فعلا نزلت تاج جديد
نورتنى

___________
واحد من الناس
انا ابقى سعيده جدا انك تبقى زائر دايم عندى
ده انت تنورنى بجد
ميرسى بجد ليك
نورتنى واهلا بيك فى اى وقت

الحصان الأسود said...

فعلاً يا ريمو كلامك صحيح

فية مدونات هايفة وتافهه وبتتناول موضوعات جنسية وبتجيب مئات يخشوها عارفة عاملة بالضبط زي موجة العرى اللي في الافلام والكليبات

لازم نادية الجندي تقلع علشان شباك التذاكر يبيع

ونبيلة عبيد و منة شلبي و اي واحدة بتقبض فلوس من المنتج لمجرد ان تتعرى و تخللي الفيلك يبيع تذاكر

وبرضة فية بعض السيدات الافاضل من المدونات المحترمات ماشية على النهج والمنوال من حيث موضوعات البوستات او التعليقات الساخنة ليهم في الكومننتات
من اجل اشباع غريزة القراء و اشباع رغبات وعُقد نقص في ذات الشخصية المدوناتية

بس انا الفضول بيقتلني اعرف المدونة اللي انتي قصدك عليها

ياريت لو حتى تبعتيلي عنوانها حتى عالايميل بتاعي, بس ابص فيها بصة اشوف اية الهيافة اللي بيتكلم فيها وبتجيب مئات المعلقين

اصل انتي ماتعرفيش فضول اخوكي قاتل جدا و زي ما بيقولوا الفضول قتل القطة

تحياتي

Reemo said...

الحصان الاسود
الموضوع مش محتاج فضول ولا حاجه
انا فى الاول كنت بتكلم عن بلوج واحد
بس دلوقتى بقوا اكتر من واحد
مفيش اكتر من الهيافه بجد
لقيت حاجات قمه الاستهبال
لا والناس مبتصدق تهيص
انت بس خدلك لفه حلوه كده على البلوجات وانت تشوف العجب
انت نورتنى بجد
واكيد ليا زياره عندك

Anonymous said...

دى اول مرة ليا ازور مدونتك بصراحة مدونة رائعة جدا واراء تستحق الاحترام اتفق معك ان الهيافة هى اللى سايدة فى كل حاجة مش فى المدونات بس زى ما بنشوف الرقاصة مثلا بتكسب اكتر من استاذ الجامعة الف مرة وبردو العيب اصلا فى قلة الثقافة زى ما بنشوف كتير جدا من المتعلمين لكن غير مثقفين جهلة وزى ما فيه ناس جادة بتدور على كل حاجة جادة ومفيدة هتلاقى غالبية عظمى من مستخدمى الكومبيوتر والنت اهتماماتهم بتنحصر فقط فى مواقع الاغانى ومواقع البورنو وكدا يعنى لكن بردو المحترم بيفضل طول عمره محترم وليس النجاح بكثرة التعليقات يكفيكى ان اللى بيزورك وبيتعرف على رأى ليكى او بيقتنع بكلام قلتيه او تركتى اثر عند اى حد ده قمة النجاح وده الهدف الاكبر انا صخصيا لو شفت اى حاجة حلوة على النت دايما باحب اعرف اصدقائى بيها علشان يستمتعوا معايا بيها مع تحياتى (وش بيغمز)

محمد عبد الغفار said...

افتكر انها كانت يا نا ننس

ببساطه المدونات شريحه من المجتمع فيها ما فيه

Reemo said...

Anonymous
فعلا عندك حق
المحترم بيفضل طول عمره محترم
واكيد الدنيا فيها من ده ومن ده
كنت اتمنى تسيب اسمك
ميرسى لزيارتك
تحياتى

________________

محمد
ناننس , فننس مش هتفرق كتير
اهو كله مدلول على الهيافه
اتفق معاك فى ان الشريحه جزء من المجمتع زى مافيه الوحش والحلو برده هى فيها الوحش والحلو
ميرسى لمرورك
تحياتى ليك