Tuesday, February 27, 2007

عالم تمثيل ثمثيل

قابلت ناس كتير وعرفت ناس كتير
وفى كل مره بتاكد اننا عايشين فى مسرح كبير
كله بيمثل على كله
محدش ابدا بيقول الحقيقه
مع ان اسهل منها مفيش
حتى اللى بيعتقد انه بيقول الحقيقه
لو قعد لحظه صدق مع نفسه
هيلاقى انه مش بيقول الحقيقه كامله
جايز بيقول اغلبها او جزء منها
بس الاكيد انه مش بيقولها كلها
كل انسان من حقه يحتفظ بجزء من حياته جواه
ومن حقه كمان ان محدش يعرف الجزء ده
انا مش ضد الموضوع ده
لانى انا واحده من الناس
بحتفظ بحاجات كتير خاصه بيا ومحدش يعرفها
لكن اللى انا ضده هى انك تكذب او تمثل شئ مش فيك
محدش بيجبر حد على الكلام
كل انسان بيقول اللى عايزه بمحض ارادته
فبما انه بمزاجك يبقى ليه تكذب
من حقك متتكلمش
لكن اعرف انك يوم ما تتكلم لازم تكون صادق
لان محدش هيسامحك لو عرف انك كذاب
ولانك يوم ما بتكذب فاول شخص بتكذب عليه هو نفسك
لان على اساس كذبك الناس هتعاملك
هتعامل الممثل اللى بيكلمهم مش انت فى حقيقتك
وجايز لو عرفت حقيقتك متتعاملش معاك اصلا
وساعتها هتبقى بتعيش نفسك اكبر كذبه فى حياتك
وجايز لما تحب ترجع للحقيقه تانى
تلاقى انه فات الاوان
................

8 comments:

Unknown said...

السلام عليكم ورحمة الله وبركاته
يسعدني دائما متابعة كلماتك يا ريم
ولكنني عندما قرأت كلمتك المعنونة (عالم تمثيل تمثيل) رأيت أن فيها نوعا من التناقض ، فكيف تطالبين الآخرين بالصدق وعدم الكذب في تعاملهم مع غيرهم ، وانتي بنفسك تعترفين أن هناك جزءا من الحقيقة خاص بكي لا يعرفه أحد أو لا تريدين من الآخرين معرفته، فأين الصدق هذا الذي تتحدثين عنه؟؟!!
تحياتي يا ريمووووووووووووو

Reemo said...

لو قريت كلامى كويس يا عادل كنت قريت الفقره اللى بقول فيها انى مش ضد ان الواحد يحتفظ بجزء خاص من حياته لنفسه لكن اللى انا ضده انك يوم ما تقول الجزء ده تكذب فيه
بمعنى انك يا تقول الجزء الخفى فى حياتك بصدق ومن غير تمثيل يا تسكت وتحتفظ بيه لنفسك وتمتنع عن الكلام فى الجزء ده
وده اللى انا بعمله بمتنع عن الكلام فى اجزاء معينه فى حياتى لانى معنديش استعداد اكذب او امثل واقول للناس غير حقيقتى علشان كده بفضل السكوت
مفيش اى تناقض فى كلامى بس تقريبا انت اللى مركزتش فى الكلام كويس
ميرسى يا عادل على مرورك

sofinqoraso said...

ما الحياة الا مسرح كبير
كلمة اللى قالها مكدبش ويمكن خلتنى كتبت انا كمان موضوع
المشكلة فعلاً يا ريمو اننا مش حاسين اننا بنمثل يعنى حاسين ان ده الطبيعى

وموضوع الجزء الخفى فى حياة كل انسان زى ما انتى قلتى مش عيب وفاهمة الحتة دى كويس
يعنى فى بنات تفضل تقول أنا راضية بقليلى ومستعدة اعيش بأقل ىحاجة ومش مهمة عندى الماديات ووقت الجد تلاقى عكس كده خالص مع ان مش عيب ابداً انها تكون صريحة من الأول وتقول لأ انا بهتم بالماديات
مش عارفة ارد لأنى حاسة بالموضوع اوى
بس عامة لازم نعرف ان محدش ليه عندنا حاجة
ومفيش حد يستاهل نكون مش نفسنا قدامه

Reemo said...

انا معاك فى دى يا نونو ان فى ناس كتير بتكدب فى حقيقتها ممكن لاسباب كتير انها مكسوفه منها او خايفه من رد فعل اللى قدامهااو مبتحبش حد يعرف عنها حاجه
لكن بجد التمثيل مش بيدوم كتير لازم يبان فى النهايه
ولان محدش بيجبر حد على الكلام و حق الصمت مكفول للجميع فالسكوت احسن كتير من الكذب
والبنات اللى بتعمل غير كده فى الاخر هتلاقى نفسها كدبت على نفسها قبل اى حد ودخلت فى مشكله صعبه ممكن تؤثر على حياتها
ميرسى يا نونو لمرورك
ربنا ما يحرمنى من ردودك يا قمر(F)

heba labeb said...

ريمو بجد انا حاسة انك كتبتى الى انا كنت حساه
وعايزة اقولة فعلا
لان الكدب بقى كتير اوى الايام دى
والنفاق بقى شغال مبيبطلش
مش عيب يكون لنا اسرار مش عايزين نقولها
بس العيب اننا نكدب عشان نخبى الاسرار دى
خاصة ان محدش بيقولك قول حاجة
دة انت الى بتيجى تكدب لوحدك
وياريت فعلا كل حد بيمثل يراجع نفسة ويبطل بقى بجد
بجد بوست تحفة يا ريمو وعجبنى جدا

Reemo said...

فعلا يا هوبه ياريت كل واحد بيكدب يراجع نفسه ويبطل بجد
لان الموضوع بقى زايد اوى عن حده
والمشكله ان محدش ضربه على ايده وقاله اكدب هو عامل كده لانه عايز يكدب
مع انه لو مش عايز يقول الحقيقه ممكن يسكت ويوفر على نفسه وعلى غيره وجع الدماغ وكتر الكلام
ميرسى يا حبيبتى لمرورك
ربنا ما يحرمنى من ردودك يارب

Salma said...

كله بيمثل على كله
محدش ابدا بيقول الحقيقه
مع ان اسهل منها مفيش
حتى اللى بيعتقد انه بيقول الحقيقه
لو قعد لحظه صدق مع نفسه
هيلاقى انه مش بيقول الحقيقه كامله

كلامك ده فعلا معناه صحيح
واللي هوه ان اي واحد لازم كلامه يدخل فيه جزء من الكذب
سواء بشكل كلي او حتى جزء من كلامه بيبقى كذب

اكيد هقولك انا ان انا مش مع اللي بيكذب فكلامه
بس اوقات في حاجات الواحد بيضطر انه ياجل قولها لوقت تاني
يعني بمعني انه يحاول يخبيها مش ينفيها
عشان سعتها بيبقى صدقها اصعب من الكذب فيها


كل انسان من حقه يحتفظ بجزء من حياته جواه
ومن حقه كمان ان محدش يعرف الجزء ده

دي عندك حق فيها
لان مهما كان للواحد صاحب او شخص قريب منه بردو هيفضل مفيش حد قريب منه اكتر من نفسه
اللي المفروض انه يبقى اصدق معاها من اي حد ادامه فعلا


وعجبني كلامك عن وشوش الناس وتمثيلهم
وعالم النفاق ده
لانه بقى دلوقتي فعلا غالب عن الصدق فيه

Reemo said...

lma
انا معاك ان فى ساعات ظروف بتجبر الواحد انه يخفى بعض الاشياء لوقت اخر وانا مش ضد ان الواحد يخبى حاجه جواه ويلتزم الصمت تجاه موضوع معين لكن الغلط انه يكدب فى الموضوع تحت ضغط اى ظرف او انسان
ميرسى يا قمر لمرورك
منوره البلوج :)